Axiaqm: Included Page: Giuseppe Camilleri

2023-06-30T01:37:37Z

Included Page: Giuseppe Camilleri

New page

{{cleanup}}
{{stub}}
Mro. '''Giuseppe Camilleri''' twieled ġewwa tas-[[Sliema]] fit-18 ta' Frar 1903. Missieru [[Ferdinando Camilleri]] kien kompożitur u mużiċista ta' fama li bejn l-1886 u l-1914 kien waqqaf u mexxa l-ewwel baned Slimiżi. Fost l-għadd kbir ta' xogħlijiet tiegħu, tnejn minnhom għandhom konnessjoni diretta mal-Parroċċa; dawn huma '''Missa Solemnis Stella Maris''' u l-Innu grandjuż għall-banda, kor, u solisti '''A Maria Vergine Stella del Mare''' fuq il-versi ta' Mons. '''P. Vella Mangion'''.

L-ambjent li trabba fih Giuseppe Camilleri sa minn ċkunitu nissel fih ġibda kbira għall-mużika, u minn kmieni beda jitħarreġ għand missieru u kuġinuh Agostino. Ta' 23 sena kien ġie maħtur surmast tal-korijiet ġewwa t-'''Teatru Rjal''' u sentejn wara kien ħa t-tmexxija tal-Banda tas-[[Soċjeta Filarmonika Stella Maris]] minn idejn missieru.

B'dan ta' l-aħħar jokkupa l-kariga ta' '''Maestro di Cappella''' f'bosta knejjes, Giuseppe ta' sikwit kien jidħol għal missieru meta xi servizzi kienu jaħbtu flimkien. Bejn l-1936 u l-ewwel snin tal-gwerra ikkompona bosta xogħlijiet; ewlenin fosthom kienu l-Opra '''Mona Bianca''' (1936), l-Operetta '''Shaltimar''' (1938) u '''Corale Religioso''' (1939). Dawn it-tliet xogħlijiet kellhom il-versi minsuġa mill-Avukat [[Ġorġ Zammit]].

Fl-1938 kiteb il-mużika ta' l-Innu popolari '''Lil Marija Kewkba tal-Baħar''' fuq il versi tal-qassis tal-Parroċċa ta' Stella Maris Dun '''P. P. Grima'''. Dan l-Innu reġa' qiegħed jiġi esegwit minn xi snin 'l hawn fil-ġranet tal-Festa ta' Stella Maris waqt iċ-ċelebrazzjonijiet li jsiru ġewwa l-Knisja. Fl-istess sena daħal għal impenn li kien jenħtieġ kuraġġ, sagrifiċċji kbar, u fuq kollox kultura mużikali qawwija, meta għaqqad kumpanija ta' l-Opra Lirika iffurmata minn kantanti u mużiċisti Maltin.

Sadanittant huwa kien ilu sena jokkupa l-kariga ta' surmast direttur tas-[[Società Filarmonica Nazionale La Valette]] liema Banda baqa' jmexxi b'abbilità kbira għal 31 sena. Mal-mewt ta' missieru fl-1942, Giuseppe wiret tradizzjoni mużikali li beda jagħtiha ħajja ġdida l-iżjed f’dak li jirrigwarda l-kompożizzjoni tal-mużika sagra. Il-mużika melodjuża li ħarġet mill-pinna tiegħu kienet xierqa għall-kult u nieqsa għal kollox minn teatralità żejda kif jixhdu l-bosta Salmi, Antifoni, 16 Innijiet Ewkaristiċi u Marjani, responsorji tal-Ġimgħa l-Kbira u l-Quddiesa Solenni tant magħrufa u mfaħħra.

Kien imfittex ħafna bħala organista u pjanista. Kien hu li kellu l-unur jakkompanja lis-sopran ta' fama mondjali Maria Caniglia fuq il-pjanuforti meta din tat xi kunċerti hawn Malta fl-1950. Bħala rikonoxximent din ilpersonalità ta' fama irregalatlu ritratt awtografat bil-kliem: '''''Al grande egregio Maestro Giuseppe Camilleri'''''. Frażi qasira b'tifsira kbira. Fl-1953, għall-okkażjoni ta' l-inkurunazzjoni tar-'''Reġina Eliżabetta II''' kkompona '''Invocation''' fuq il-versi tal-Avukat Ġorġ. Zammit. Xogħol sabiħ ieħor kien '''Id-Dawl mit-Tempesta''' fuq il-versi ta' Dun [[Frans Camilleri]] li kien kiteb għall-okkażjoni tal-'''Festi Ċentinarji Pawlini''' fl-1960.

Il-kompożizzjoni u d-direzzjoni huma żewġ oqsma tal-mużika distinti minn xulxin. Giuseppe Camilleri bbrilla fit-tnejn. Il-bakketta tiegħu kienet toħroġ mill-orkestranti dik il-ħeġġa u l-ħlewwa li hu kien tant magħruf għaliha. Il-ftaħir qatt ma għamel bih. Kien ta' spiss ilissen: '''''nipprova nagħmel mill-aħjar ...''''' . Kien raġel umli u onest u li bl-imġiba u l-manjieri tiegħu kien jiġbed issimpatija ta' kulħadd. Kellu rispett u sottomissjoni assoluta lejn l-awtoritajiet tal-Knisja; l-aġir tiegħu·fi żmien ir-riformi fil-Liturġija wara l-Konċilju kien tassew altruwista u mnebbaħ biss minn imħabba ġenwina għall-mużika. Għall-Knisja ta' Stella Maris Giuseppe Camilleri kellu ġibda naturali li twieldet u kibret miegħu. Hija ħaġa ċerta li ħafna mill-kompożizzjonijiet ta' mużika sagra ġew imnebbhin mill-imħabba li kellu għal din il-Knisja. Sa l-1975 baqa' jagħti s-servizzi tiegħu minkejja li saħħtu kienet bdiet sejra lura.

Miet fit-tieni jum tat-Tridu ta' Stella Maris, nhar il-Ħamis 19 ta' Awissu 1976. Il-Madonna li tant faħħar u gglorifika permezz tat-talenti li Alla tah, sejħitlu għall-premju ta' dejjem fil-ġimgħa tal-Festa tagħha li f'ħajtu tant issolennizza bil-mużika melodjuża tiegħu.

{{DEFAULTSORT:Camilleri, Giuseppe}}
[[Category:A-Z of the Malta Music Scene]]
[[Category:Bandmasters]]
[[Category:Born in 1903]]
[[Category:Died in 1976]]

Giuseppe Camilleri - Revision history

Axiaqm: Included Page: Giuseppe Camilleri